༄༅།།ཀླུ་ཆུའི་སྟོན་བཤད།
ཡ། རྩྭ་སྐྱེས་སྐྱེས་ཚང་མ་སྨན་ཏོག་ཡིན་ས། འབྲུ་རིགས་སྣ་ལྔ་ལ་སོགས་ཞལ་ཟས་རོ་བརྒྱ་ལྡན་ས། འབྲི་ཐུལ་མ་རྣ་ཙོར་ལྡེམ་མེ་བྲེ་སེར་འབྲོང་ལ་འདྲེས་ས། རྟ་མདོ་བ་རྨིག་སྒྲ་ལྡིར་རེ་གཡུ་འབྲུག་ཚང་ནས་ལངས་འདྲ། ལུག་ཚེར་མོ་བལ་ཁ་གྱི་ལེ་ནམ་མཁའི་སྤྲིན་དང་མཉམ་འདྲ། མ་སྲུ་མོ་གཡུ་བྱུར་ལྡེམ་མེ་རྨ་བྱའི་སྒྲོ་གར་ཕུབ་འདྲ། ཕ་ཨ་ཁུ་འཛུམ་ཆུང་ཤོད་ལེ་རི་རྒྱལ་བཞིན་དུ་བརྟན་ས། འདི་འདྲའི་ཕ་ས་སྐྱིད་པོ་འདི། ཕ་ཡུལ་ཀླུ་ཆུའི་རོང་འབྲོག་ཡིན་ནིས་ཟེར་ག
། དབྱར་གསུམ་ལོ་ཡག་སྙེ་མའི་གར་སྟབས་བསྒྱུར་ན། གོས་ལྗང་སྨུག་གི་ན་བཟའ་ཐང་ལ་བཏིང་འདྲ། སྟོན་གསུམ་སེར་པོ་གསེར་གྱི་འོད་མདངས་འཚེར་ན། ཞིང་འབྲུ་དྲུག་གི་སྙེ་མ་མཛོད་དུ་སྤུངས་འདྲ། འདི་སྡེ་གྲུ་བཞི་ཆགས་གི་གཡང་རྟེན། འབྲུ་རིགས་སྣ་ལྔའི་འི་བང་མཛོད་ཡིན་ནིས་ཟེར་ག།
ཡ། བྱ་དང་བྱིའུས་སྤྲོ་གླུ་ལེན་ས། སྨད་ཀྱི་ཞིང་ས་གསེར་གྱི་གཞོང་བ་ལ། འབྲུ་དྲུག་ལོ་ཡག་གི་སྙེ་མ་མགོ་ལྕོག་ལྡེམ་ས། མ་བཏབ་ལྗོན་པའི་གཡུ་ལོའི་བར་ན། བཟའ་ཤིང་གི་འབྲས་བུ་གཡུར་དུ་ཟ་ས། ལུང་བ་དུང་དཀར་གཡས་འཁྱིལ་འདྲ་བའི་ནང་ན། སྡེ་ཆེན་པོ་ནོར་བུ་མཛོད་ལ་སྤུངས་འདྲ།
ཡ་་་་་་་་སྟ་རེ་བསྲིངས་ན་ནགས་ལ་རྩེབས་ས། ཐོམ་བུ་བསྲིངས་ན་ཆུ་ཁར་རྩེབས་ས། ས་ལ་དགེ་བཅུ་ཚང་ས། མི་ལ་བདེ་སྐྱིད་འཛོམས་ས་འདི། སྡེ་ཆེན་པོ་ཐང་ལུང་དཔོན་ཚང་རེད་ཟེར་ག།
ཡ་་་་་་སྟོད་ཧི་མ་ལ་འདི་གངས་གི་བདག་པོ། ཞི་བདེ་རྒྱ་མཚོ་ཆེན་པོ་ཆུ་ཡི་བདག་པོ། ས་དོག་མོ་གཡང་ར་གྲུ་བཞི་གཏེར་གྱི་བདག་པོ། ང་མགོ་ནག་བོད་པ་རྟེན་འབྲེལ་གྱི་བདག་པོ་ཡིན་པས། ངས་མཚམས་འདི་ནས་ཁ་གཡང་བཀྲ་ཤིས་འཁྱིལ་བ་རེ་འཇོག་ཡ།
གསལ་བ་ཉི་ཟླའི་འོད་ཀྱིས་བཀྲ་ཤིས་ཤོག
བརྟན་པ་མི་འགྱུར་ལྷུན་པོ་བཀྲ་ཤིས་ཤོག
སྙན་པ་ཁུ་བྱུག་གདངས་ཀྱི་བཀྲ་ཤིས་ཤོག
གྲགས་པ་གཡས་འཁྱིལ་དུང་གི་བཀྲ་ཤིས་ཤོག
བྱ་བ་རྟགས་བརྒྱད་ལས་ཀྱི་བཀྲ་ཤིས་ཤོག
མི་རྣམས་ཚེ་ཐག་རིང་བའི་བཀྲ་ཤིས་ཤོག
འཛམ་གླིང་ཞི་བདེ་ཡོང་བའི་བཀྲ་ཤིས་ཤོག
གངས་ཅན་བོད་ལ་རླུང་རྟ་དར་བའི་བཀྲ་ཤིས་ཤོག
ཆོས་སྲིད་མཚོ་ལྟར་རྒྱས་པའི་བཀྲ་ཤིས་ཤོག
བཀྲ་ཤིས་གཡང་དུ་འཁྱིལ་བའི་བཀྲ་ཤིས་ཤོག